🤍 ပုလဲလေးတွေဟာ အဖိုးတန်ကျောက်မျက်ရတနာတွေများအထဲမှ သက်ရှိသတ္တဝါက ရရှိပြီး သွေးစရာမလိုတဲ့ သဘာဝရဲ့ ရတနာစစ်စစ်လေးတွေပဲ ဖြစ်ပါတယ်။ ပုလဲမှာ သဘာဝအတိုင်း တွေ့ရှိရတဲ့ပုလဲ နဲ့ သေချာစနစ်တကျမွေးမြူပြီးမှ ရရှိတဲ့ပုလဲဆိုပြီး (၂) မျိုးရှိပြီး သဘာဝအတိုင်း ပုလဲကို ရရှိဖို့က အရမ်းကိုရှားပါးပြီး ခက်ခဲပါတယ်။
🤍 မွေးမြူပြီး ထုတ်ယူရတဲ့ ပုလဲလေးတွေကို ရေငန်ပုလဲနဲ့ ရေချိုပုလဲဆိုပြီး (၂) မျိုးခွဲနိုင်ပါတယ်။ ရေငန်ပုလဲကိုတော့ (၃) မျိုး ထပ်ခွဲနိုင်ပါတယ်။ ရေငန်ပုလဲတွေကတော့ တောင်ပင်လယ်ပုလဲ၊ ဂျပန်အာဂိုယာပုလဲနဲ့ ပုလဲနက်တို့ ဖြစ်ပါတယ်။
🤍 တောင်ပင်လယ်ပုလဲ
တောင်ပင်လယ်ပုလဲတွေကတော့ ဩစတေးလျ၊ အင်ဒိုနီးရှားနဲ့ ဖိလစ်ပိုင်တို့မှာ တွေ့ရှိရပြီး အရောင်အားဖြင့် အဖြူရောင်၊ ငွေရောင်နဲ့ ရွှေရောင်ဆိုပြီး ကမာအမျိုးအစားပေါ်မူတည်ပြောင်းလဲနိုင်ပါတယ်။ ပြီးတော့ တောင်ပင်လယ်ပုလဲတွေက ပုံမှန်ပုလဲတွေထက် ပိုကြီးပြီး ဈေးကွက်ထဲမှာ တွေ့ရှိရတဲ့ ပုလဲအရွယ်အစားရရှိဖို့ကိုတော့ ၂ နှစ်ကနေ ၄ နှစ်အထိ အချိန်ပေးရပါတယ်။
🤍 အာဂိုယာပုလဲ
အာဂိုယာပုလဲတွေကတော့ သူရဲ့ ခရင်ရောင်နဲ့ အဖြူရောင်ကြောင့် နာမည်ကျော်ကြားလူကြိုက်များပါတယ်။ များသောအားဖြင့် အမေရိကန်နဲ့ အနောက်ဥရောပနိုင်ငံများမှာ နာမည်ကျော်ကြားပြီး ဂန္ဓဝင်ပုလဲဆိုပြီး ခေါ်ဆိုသမုတ်ကြပါတယ်။ အာဂိုယာပုလဲတွေက ညီညာလွန်းတာကြောင့် ပုလဲဆိုတာနဲ့ ပြေးမြင်ရလောက်အောင် သိကြတဲ့ ပုလဲပုတီးတွေကို အာဂိုယာပုလဲနဲ့ ဖန်တီးကြပါတယ်။ ဈေးကွက်ထဲက အာဂိုယာပုလဲများကိုတော့ ဂျပန်နိုင်ငံနဲ့ တရုတ်နိုင်ငံမှ အဓိကမွေးမြူထုတ်လုပ်ပေးနေပါတယ်။
🤍 ပုလဲနက် ( Tahitian Pearls )
ပုလဲနက်တွေကိုတော့ အင်ဒိုပစိဖိတ်ဒေသမှာ အဓိကတွေ့ရှိရပါတယ်။ Pinctada margaritifera လို့ ခေါ်တဲ့ Black-lip မုတ်ကောင်တွေကနေ ရရှိပါတယ်။ ပုလဲနက်တွေကို တဟီသီပုလဲလို့လည်း ခေါ်ကြပါသေးတယ်။ အကြောင်းကတော့ ပြင်သစ်လက်အောက်ခံ တဟီသီကျွန်းကနေ အဓိကရရှိနေတာကြောင့် ဖြစ်ပါတယ်။ ကမ္ဘာပေါ်မှာ ဒုတိယဈေးအကြီးဆုံးပုလဲဖြစ်ပြီးတော့ အနက်ရောင်အပြင် မီးခိုးရောင်၊ အညိုရောင်၊ နဲ့ ဒေါင်းမြီးရောင်လိုမျိုး အစိမ်းရောင်မျိုးအထိ အရောင်ခပ်ပျော့ပျော့တွေနဲ့ ဆွဲဆောင်နိုင်တဲ့ ရေငန်ပုလဲတစ်မျိုးဖြစ်ပါတယ်။ မြန်မာနိုင်ငံ မြိတ်ကျွန်းစုက ရရှိတဲ့ပုလဲတွေကလည်း ရေငန်ပုလဲအမျိုးအစားထဲမှာ ပါဝင်ပါတယ်။
🤍 ရေချိုပုလဲ
ရေချိုပုလဲတွေကတော့ ဈေးကွက်ထဲမှာ အတွေ့အများဆုံးပုလဲဖြစ်ပြီး ဈေးသက်သာတာကြောင့် လက်ဝတ်ရတနာခတ်လုပ်သူတွေရော ဝတ်ဆင်သူတွေပါ သဘောကျနှစ်ခြိုက်ကြတဲ့ ပုလဲအမျိုးအစားဖြစ်ပါတယ်။ ရေချိုကန်များနှင့် ကန်များတွင် မွေးမြူကြပြီး ကမာတစ်ကောင်တွင် ပုလဲများစွာ ရရှိနိုင်တောကြောင့် စီးပွားရေးအရ တွက်ခြေကိုက်တဲ့ ပုလဲမွေးမြူမှုမျိုး ဖြစ်ပါတယ်။ ရေချိုပုလဲတွေကိုတော့ တရုတ်နိုင်ငံက အဓိက မွေးမြူထုတ်လုပ်ပေးနေပါတယ်။
ဇွန်လဖွားလေးတို့ရဲ့ အဆောင် ပုလဲ အမျိုးအစားတွေအကြောင်း မင်မင်က ဗဟုသုတရစေဖို့ မျှဝေပေးလိုက်ပါတယ်နော်။
